Opisyal na nga nag-file sang certificate of candidacy (COC) si Raisa Treñas-Chu kag magapapili ini bilang Mayor sang Iloilo City para sa 2025 midterm elections.
Sa interview sang Bombo Radyo kay Treñas-Chu, iya ginpahayag nga apisar ang iban ang nagahambal nga bata pa siya sa amo nga posisyon, nagapati ini nga mapadayon ini ang kauswagan nga ginsugoran sang iya nga amay nga si Mayor Jerry Treñas.
Ginkumpirma man sang anak sang alkalde nga magaretiro na ang iya amay sa pulitika.
Gin-athag man sang natungdan nga wala sila sang ginbutang nga kandidato sa pagka-kongresista sa ila nga linyada.
Nagpanindugan man si Raisa Trenas-Chu nga ginsunod sang ila nga grupo ang nangin mando sang matag-as nga lideres gikan sa national nga bahin.
Suno kay Treñas-Chu, “To be a good leader is also to be a good follower.”
Gintumod man sini nga apisar nga wala pa sila ginsapol ni House Speaker Martin Romualdez, handa na kag kompleto ang ila linyada para sa palaabuton nga eleksyon.
