ILOILO CITY – Ginpamatud-an sang isa ka estudyante nga masarangan sini nga mangin isa ka maayo nga amay sa pihak sang lamharon sini nga edad.
Ini amo si Delmar Moquete, 25, residente sang Barangay San Isidro, Jaro, Iloilo City.
Sa interview sang Bombo Radyo kay Moquete, iya ginpahayag nga wala siya nagalaom nga temprano pa siya nga mangin isa ka amay.
Ini apisar nga naga-eskwela pa lang ini sa subong sa kolehiyo sa kurso nga Hospitality Management sa Iloilo Science and Technology University.
Suno kay Moquete, bangud may duha ka bulan nga siya nga anak, nagahimakas siya nga makatapos sang pagtuon kag mapapangita sang trabaho.
Kun sang una suno sa natungdan, nagapasaway ini sa iya amay kag iloy, sa subong, naintindihan na sini ang sitwasyon sang isa ka ginikanan.
Agud makabulig ini sa iya pamilya, nagapangita pa gid ini sang trabaho kaangay na lang sang online selling, kag nagapasakop sa mga talent competition.
Nagalaom man ini nga sa tion nga makatapos kag makapangita sang trabaho, mabalikan sini ang kabudlay sang iya ginikanan.
