Maga-umpisa buwas, Marso 2, ang Holy Month of Ramadan sa Pilipinas.
Ginhimo ni Bangsamoro Grand Mufti kag Executive Director of the Bangsamoro Darul-Ifta’ Sheikh Abdulrauf Guialani ang anunsyo kagab-i matapos nga nagpatigayon sang moon sighting sa pungsod.
Wala nakit-an ang crescent moon suno sa iya, gani nga opisyal nga maga-umpisa sang Ramadan Fasting 2025 buwas.
“By the authority vested in me as the Bangsamoro Mufti, I, Abdulrauf A. Guialani, hereby announce that the crescent moon was not sighted today. Therefore, Ramadan fasting 2025 will officially commence on Sunday, March 2, 2025, In Shaa Allah,” suno sa Grand Mufti. “Happy Ramadhan 1446, and may Allah shower His blessings and mercy upon all of us.”
Base sa tradisyon sang Islam, kun indi kit-anon ang bulan, dapat nga makumpleto ang current lunar month sa sulod sang 30 ka adlaw.
Nagalain-lain man ang pag-umpisa sang Ramadan sa nanuhay-tuhay nga mga pungsod depende sa lunar sighting.
Ang moon sighting nga kilala man nga hilal sighting amo ang nagatumod sa pagsugod sang bag-o nga lunar month bangud ginasunod sang Islamic calendar ang cycle sang bulan.
Ang Ramadan amo ang ika-siyam nga bulan sa kalendaryo sang Islam kag isa sa pinaka-balaan nga tinion para sa mga Muslim.
Tion ini sa pag-puasa kag pagpangamuyo, gani ginalikawan sang mga Muslim ang pagkaon kag pag-inom halin sa pagbutlak sang adlaw tubtub sa pagtunod sini.
May exemptions man ini kaangay sang may sakit sa lawas kag panghuna, mga nagabusong kag nagapasuso, kag mga tigulang nga nagakinahanglan sang pagkaon para sa kusog.
Sa sini nga mga tion, wala man nagapanigarilyo kag nagapakighilawas ang mga Muslim.
Eid al-Fitr naman ang tawag kun magtakop ang Ramadan kag ginaselebrar sa una nga tatlo ka adlaw sang Shawwal nga amo ang pang-10 nga bulan sa Islamic calendar.
