Nagbaskog kag nahimo nga tropical storm si Bagyo Ramil.
Sa 5:00 a.m. weather bulletin sang Philippine Atmospheric, Geophysical and Astronomical Services Administration (PAGASA), ginpahayag nga ulihi nakit-an ang sentro sang bagyo sa kalayuon nga 305 km nasidlangan sang Juban, Sorsogon.
Dala sang bagyo ang kabaskugon sang hangin nga 65 km/h malapit sa sentro kag pagmadlos nga tubtub sa 80 km/h. Nagahulag ini sa direksyon nga pa-nakatundan sa kadasigon nga 20 km/h.
Napaidalom na subong sa Wind Signal Number 2 ang Camarines Norte, Catanduanes, kag ang northern portion sang Camarines Sur.
Sa Luzon gihapon, signal Number 1 sa Cagayan lakip na sa Babuyan Islands, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, Pangasinan, Aurora, Nueva Ecija, eastern portion sang Bulacan, eastern portion sang Tarlac, eastern portion sang Pampanga, northern kag eastern portions sang Quezon lakip na sa Polillo Islands, Camarines Norte, nabilin nga bahin sang Camarines Sur, Albay, Sorsogon, Burias Island, kag Ticao Island.
Sa Visayas, napaidalom man sa Signal No. 1 ang Northern Samar, northern portion sang Eastern Samar, kag northern portion sang Samar.
Gina-forecast nga magahulag si Ramil pa-nakatundan naaminhan-nakatundan padulong sa area sang Central-Southern Luzon.
Sa forecast track, mahimo mag-landfall ukon maglabay ang sentro sang bagyo malapt sa Catanduanes karon sa hapon ukon sa gab-i. Pagkatapos, magahulag ang bagyo pa-nakatundan naaminhan-nakatundan kag magalaslas malapit sa Vinzons, Camarines Norte kag Polillo Islands buwas sa aga.
Sa aga ukon sa hapon buwas, Oktubre 18, mahimo mag-landfall pa gid ang bagyo sa Aurora ukon Isabela. Pagkatapos, magaagi ini sa kabukiran sang Northern kag Central Luzon kag magatuhaw liwat sa West Philippine Sea sa buwas sa hapon ukon sa gab-i.
Ginalantaw nga magaguwa ang bagyo sa Philippine Area of Responsibility (PAR) sa Lunes sang aga.
