LEGANES, ILOILO – Ginkumpirma ni Senate Minority Leader Franklin Drilon nga nagpahayag sang interes ang Presidente kag Chief Operating Officer sang San Miguel Corporation nga si Ramon Ang nga mag-invest sa pagatukuron nga Iloilo-Guimaras-Negros bridge.
Ini ang kasunod man sang ground breaking ceremony sang San Miguel Corporation para sa pagatukuron nga P6.7 billion nga Iloilo brewery sa Brgy. Gua-an, Leganes, Iloilo.
Nangin dinapit man nga bisita sa kahiwatan si Department of Environment and Natural Resources (DENR) Sec. Roy Cimatu.
Sa exclusive interview sang Bombo Radyo Iloilo kay Drilon, iya ginpahayag nga may yara na sang ginpatigayon nga feasibility study para sa nasambit ng proyekto.
Suno kay Drilon, ginplastar sa nasambit nga negosyante ang pagatukuron nga 2.5 kilometers nga taytay nga tukuron mismo sa Brgy. Gua-an, Leganes, Iloilo kun sa diin man pagatukuron ang brewery.
Ginpahayag sang Ilonggo Senator nga mismo si Ang ang nagpahayag nga magapasa sang unsolicited proposal para sa pagatukuron nga taytay.
Magluwas sini, nagpanugyan man si Drilon kay Ang nga idumala man niya ang Iloilo International Airport nga nagapaidalom subong sa expansion.
Samtang, suno naman kay Iloilo City Mayor Jerry Treñas, ginlibot ni Sen. Drilon si Ang sa Syudad sang Iloilo kag ginpakita ang mga ginpatukod nga proyekto.
Suno kay Treñas, nagpahayag man sang interes si Ang nga mag-invest sang mga negosyo sa Syudad sang Iloilo.
Ginalauman naman nga magadala sang madamo nga trabaho ang pagatukuron nga mga negosyo.
