ILOILO CITY- Magapatigayon sang random checking sa mga merkado sa Syudad sang Iloilo ang mga meat inspectors sang Local Economic Enterprise Office (LEEO).
Ini may kaangtanan sa kampanya nga mapabilin nga hilway sa African Swine Fever(ASF) ang Syudad sang Iloilo.
Sa interview sang Bombo Radyo kay Maricel Mabaquiao, pinuno sang nasambit nga talatapan, iya ginpahayag nga suguran ini sang task force ASF sa pinakamadali nga panahon.
Suno kay Mabaquiao, kaupod sang mga inspectors ang Task Force Anti-hot Meat nga amo ang magapatigayon sang random checking sa mga merkado, lakip na ang mga baligyaan sang karne sa sulod sang malls.
Una na nga nagpaandam ang Department of Agriculture Region 6 sa publiko nga mangin mabinantayon agud maprotektahan ang PHP20 billion nga hog industry sa Western Visayas.
