ILOILO CITY – Nagtuga sang pagsalangisag ang ginpatigayon nga random COVID-19 surveillance test sang Iloilo City Government sa mga kumprador kag fish vendors sa Iloilo Fish Complex.
Ini matapos ang pagkinagual sang mga ini sang ginkibot sang pamunuan sang Iloilo Fish Port Complex sang mandatory nga pagpakita sang test result sang Reverse Transcription Polymerase Chain Reaction (RT-PCR) test bag-o makasulod sa amo nga lugar.
Sa interview sang Bombo Radyo kay Mr. Jeck Conlu, spokesperson sang COVID-19 Team, iya ginpahayag nga target sang ila grupo nga magpatigayon sang on the spot swab testing sa 100 ka tawo sa kada lugar nga prone sa COVID-19 infection.
Suno kay Conlu, 53 lang ka tawo ang natigayon nga maswab sa Iloilo Fish Complex sa ila surveillance test sa diin naggwa man nga lunsay negatibo ang mga ini.
Magluwas diri, ginpahayag ni Conlu, nga nagpatigayon man sila sang random COVID-19 surveillance test sa Iloilo Terminal Market sa 100 ka tawo.
Ini ang ginalakipan sang mga vendors sa sulod sang nasambit nga merkado kag pila ka mga personnel sang Local Economic and Enterprise Office (LEEO).
Gin-athag man sang natungdan nga libre ang tanan nga swab testing kag makuha man ang resulta sa sulod lamang sang isa ka-adlaw.
Dugang pa niya, katuyuan sini amo ang ang mamonitor ang ang mga kaso sang COVID-19 sa mga lugar nga crowded kag lapanagon ang pagsaka sang COVID-19.
Samtang, ginpahayag naman sang pamunuan sang Iloilo Fish Complex nga mahimo na makasulod sa fishport apisar wala sang dokumento nga nagapamatuod nga negatibo sa swab test.
Sa interview sang Bombo Radyo kay Dr. Justo Anaquita, spokesperson sang Iloilo Fish Port Complex, iya ginpahayag nagsalangisag lamang ang mga tawo sa fishport bangud sa on the spot nga swab testing nga ginpatigayon sang COVID-19 Team.
Apang apisar sini, iya ginkalipay nga lunsay negatibo man ang nangin resulta sang swab test sa 53 ka mga vendors.
Liwat man nga nagpahanumdom si Anaquita sa mga fish vendors kag kumprador nga padayon nga sundon ang tanan nga health protocol sa sulod sang Iloilo Fish Port kaangay sang pagsuksok sang faceshield, facemask, pagsuksok sang rubber boots kag temperature check bag-o magsulod sa nasambit nga lugar.
