Nagpangabay si anay Kabataan Party-list representative Raoul Manuel nga matigayon na ang impeachment trials batok kay Vice President Sara Duterte.
Ini kasunod man sang pag-anunsyar sang bise presidente nga mapadalagan sya sa pagkapresidente sa 2028.
Sa interview sang Bombo Radyo kay Manuel, iya ginpahayag nga kun indi masabat sang insakto ni Duterte ang mga pamangkut nahanungod sa budget sang iya opisina, mas dako ang posibilidad nga indi man sini maubra sang insakto ang iya obligasyon sa mas mataas nga posisyon.
Suno pa sa iya, imbes nga hatagan sini sang atensyon ang pagpangampanya kag pagpaguwa nga biktima sya sang political persecution, mas maayo kun magapangatubang anay ini sa grave constitutional charges.
Nagapati man ang anay kongresista nga dapat nga madayun na ang impeachment trial sini agud nga maguwa na ang mga ebidensya kontra sa iya nahanungod sa confidential funds.
