ILOILO CITY – Padayon pa nga gina-imbestigaran sang National Grid Corporation of the Philippines ang rason sang nagluntad nga total blackout sa halos kabilugan sang Western Visayas.
Sa interview sang Bombo Radyo kay Mr. Reagan Alcantara, Lead Specialist sang National Grid Corporation of the Philippines, iya ginpahayag nga may na-monitor nga nakatandog sa ila nga power grid.
Agud nga indi maguba ang mga equipment nga makaresulta sang mas malawig nga power interruption, automatic nga ginapatay ang iban nga mga equipment.
Indi pa matumod kun ano ang nakatandog sa power grid.
Wala man ginadula ang pila ka mga external factors sa grid disturbance lakip na ang panahon.
Sa subong, nagbalik na ang duha ka mga major plants sa Panay.
Nagpagwa naman sang advisory ang National Grid Corporation of the Philippines nga posible may ipatuman nga manual load dropping bangud sang manubo nga suplay sang kuryente kasunod sang limitado nga availability sang power plants.
Nakabalik na ang suplay sang kuryente sa pila ka bahin sang Western Visayas.
