Wala pa sa gihapon natumod kun sa diin naghalin ang ginaalegar krudo nga nagatagas sa isa ka daku nga bubon sa Barangay Compania Central, Molo, Iloilo City.
Sa interview sang Bombo Radyo kay Engineer Noel Hechanova, pinuno sang City Environment and Natural Resources Office (CENRO), iya ginpahayag nga kun basehan lang ang baho kag itsura sang liquid, daw krudo gid ang amo nga kemikal apang agud makasigurado, ipa-check pa ang sample sini sa mga oil companies sa masunod nga semana.
Wala sang gasoline station malapit sa amo nga bubon kag wala man sang iban nga dalagku nga establisemento magluwas lang sa isa ka bakery.
Suno kay Hechanova, sa ila pag-inspect sa bakery, wala gid sang deperensya sa mga tubo nga amo ang naga-connect sa ila tangke sang krudo.
Apang nagapati si Hechanova nga kinahanglan ang isa ka third party agud mausisa sang maayo kun naga-leak ang tangke sang krudo sang bakery.
Wala man ginadula ang posibilidad nga may yara sang nagsasko sa bubon ukon naghulog sang balde nga may sulod nga krudo.
Apang kun basehan naman ang pahayag ni Punong Barangay Reyland Hervias, nasag-ahan na ang bubon apang wala man sang nakit-an nga balde ukon anuman nga equipment sa idalom.
Sa subong, gintakpan lang anay ang bubon agud malikawan ang paglapta sang baho nga amo ang nagaperwisyo sa mga pumuluyo sa palibot.
