ILOILO CITY- Nagakadapat nga diplomasya ang mangibabaw sa pagresolba sang nagluntad nga insidente sa Recto Bank sa West Philippine Sea, sa diin ginpabay-an sa tunga sang kalalawran ang mga manugpangisda nga mga Pilipino matapos ginbungguan sang Chinese fishing vessel ang ila sakayang pandagat.
Sa interview sang Bombo Radyo kay Vice Admiral Joel Garcia, Deputy Commandant for Administration sang Philippine Coast Guard (PCG) kag direktor sang National Coast Watch Center, iya ginpahayag nga nagakadapat nga mangin rasyonal kag indi mangin emosyonal sa pag-atubang, pagbatun kag pagsolbar sang insidente nga nagluntad sa Recto Bank.
Nagakadapat man nga maistoryahan sang maayo sang Pilipinas kag China ang problema agud mahatagan sang solusyon.
Pahayag pa ni Garcia nga ang pungsod ang yara sa idalom sang Diplomatic Rules nga nagakadapat sundon.
Kinahanglan man ang maayo nga komunikasyon agud mas masolbar sang maayo ang nasambit nga problema.
Iya man gindayaw si Presidente Rodrigo Duterte sa nangin tindog sini sa isyu bangud nakahibalo suno kay Garcia ang Presidente kun ano ang nagakadapat nga himuon kag ini ang pagpatapos sa imbestigasyon nga patigayunon sang Department of Foreign Affairs (DFA) kag iban pa nga ahensya sang gobyerno.
