Ginpanginwala sang aktor nga si Raymart Santiago nga gin-abusuhan sini ang iya anay asawa nga si Claudine Barretto.
Kabahin ini sang iya ginpaguwa nga statement matapos gin-release sang entertainment insider nga si Ogie Diaz ang tell-all interview sa matriarch sang Barretto family nga si Estrella “Inday” Barretto.
Sa amo nga interview, gin-alegar ni Inday nga may pisikal kag emosyonal nga pagpang-abuso nga ginhimo si Raymart kay Claudine. Gin-alegar pa sini nga nasaksihan mismo sang iya apo nga si Santino ang ginapahayag nga pagpanakit sang aktor. Dugang pa sang iloy nga Barreto, gin-angkon ni Raymart ang propiedad nga para kuntani sa iya kabataan.
Sa statement naman ni Raymart, ginsiling sini nga nagapalapta si Mrs. Barretto sang “untruthful and slanderous narrative.”
Gin-akusaran man sini si Claudine nga naga-sulit-sulit sa paggamit sa social media kag nagahimo sang “trial by publicity” agud nga ma-discredit siya.
Suno sa mga abogado ni Raymart, nag-umpisa ang sentimyento sang iloy nga Barretto sa conjugal land nga ginbaligya ni Claudine tatlo ka tuig na ang nakaligad apisar nga wala sang ihibalo ang aktor natuhoy diri.
Gindugang sa statement nga indi luyag ni Raymart nga ma-involve sa anuman nga dispute ukon iregularidad nga posible nahimo ni Claudine.
Ginpahanumdom man sang mga abogado ni Raymart sa kampo sang mga Barretto nga may yara sang gag order halin sa Mandaluyong City Family Court nga ginpaguwa sang September 2023 kag tinuig man ini nga ginsunod sang aktor.
“Let this be a final warning that any utterances in contravention of the law shall be dealt with before the appropriate forum to protect our client’s rights and to preserve his interests,” kabahin sang statement.
Matandaan nga nagpakasal sanday Claudine kag Raymart sang 2006 apang nag-file sang annulment sang 2013. Si Santino amo ang ila isahanon nga biological child, kag gin-adopt naman ni Claudine sanday Sabina, Quia, kag Noah.
