Umpisahan naman sang Commission on Elections (Comelec) – Antique ang Oplan Pangbaklas subong nga semana agud nga mapangkakas na ang campaign posters nga iligal nga ginapangpaskil sa palibot sang probinsya.
Sa interview sang Bombo Radyo kay Antique Provincial Election Supervisor Atty. Wil Arceño, iya ginpahayag nga pangbaklason man ang mga campaign materials nga wala nagasunod sa husto nga size requirement kag ang mga ginpangtapik sa indi designated nga mga lugar pati na sa mga kahoy.
Buwas, Pebrero 8, sa una nga adlaw sang campaign period para sa national candidates, may yara na sang aktibidad si senatorial aspirant Loren Legarda kag may isa man ka partylist group nga may kick-off activity.
Taga-Antique ang first nominee sang amo nga partylist suno kay Arceño.
PEACE COVENANT SIGNING
Well-attended ang peace covenant signing nga ginpatigayon sang Comelec sa probinsya sang Antique kaina. Suno kay Arceño, nagkomiter man ang mga kandidato nga magkooperar para sa malinong nga eleksyon sa probinsya.
I-maintain suno kay Arceño ang record sang probinsya nga wala sang recorded nga election-related nga violence halin sang 2019.
DUGANG NGA MGA PAHANUMDOM
Sa pag-umpisa sang campaign period, nagpahanumdom ang Comelec nga indi pwede ang pagpanagtag sang donations — in kind man ukon cash.
Indi pwede ang pagpanghatag sang pagkaon, ukon “anything of value.”
Sa tanan nga mga kandidato nga magakampanya, kinahanglan nga may yara gid sang permit halin sa Comelec Campaign Committee.
Yari ang dugang nga mga pahanumdom para sa national candidates:
Wala na sang physical contact kun magpangampanya — wala sudlanay sa balay, pagkupo-kupo- ukon pagbeso-beso.
Istrikto nga ginadumilian ang gathering sang tuman ka damo nga tawo.
Sa in-person campaigns, holding of rallies, caravans kag iban pa nga kaangay nga campaign, kinahanglan gid anay nga may yara sang permit sang Committee paagi sa pag-apply sa regional ukon provincial election offices kun sa diin patigayunon ang aktibidad. ##
