High-risk ang classification sang syudad sang Iloilo santo sa active cases sang COVID-19 nga narekord sang Hulyo 7-14.
Ini ang paathag sang Department of Health (DOH) kasunod sang mga kwestyon kun ngaa ginpasaka sa Enhanced Community Quarantine (ECQ) ang classification sang syudad epektibo tubtub sa Hulyo 31.
Sa interview sang Bombo Radyo kay Dr. Bea Camille Natalaray, designated spokesperson sang DOH Region VI, iya ginpahayag nga adlaw-adlaw ang monitoring sang DOH kag amo sini ang resulta sa active COVID-19 cases:
Hulyo 2-6 – Moderate Risk
Hulyo 7-14 – High Risk
Hulyo 16 – Moderate Risk
Sa bahin sang hospital utilization rate, 84.59% ang Iloilo City — rating nga natuon sa high-risk classification.
Santo sa latest nga pag-monitor sang ahensya, 51% sang mga yara sa ospital sa Iloilo City amo ang mga residente halin sa lain-lain nga probinsya sa Western Visayas, samtang 48% naman ang nagikan mismo sa Iloilo City.
Ginpaathag ni Natalaray nga may iban man nga apex hospitals sa Rehiyon VI, apang diri sa syudad sang Iloilo nahamtang ang Western Visayas Medical Center (WVMC) nga amo ang regional referral hospital para sa COVID-19 patients nga nagakinahanglan sang tertiary care.
Una diri, gintawag ni Mayor Jerry Tre?as nga indi patas kag unjustified ang pagpaidalom sa Iloilo City sa ECQ bangud suno sa iya, ang kaso sa Iloilo City subong nga Hulyo ang 20 porsyento nga mas manubo ipaanggid sa bulan sang Hunyo.
