ILOILO CITY- Nakilal-an na ang rebelde nga napatay sa engkwentro sa tunga sang 61st Infantry Batallion kag mga katapo sang Regional Headquarters (RHQ), Komiteng-Rehiyon Panay (KRP) kag Central Front nga nagluntad sa Barangay Cabatangan, Lambunao, Iloilo.
Ang napatay amo si Jose Jerry Tacaisan, alyas Miller/Bronze, 54 anyos, residente sang Sitio Tabionan, Barangay Bucari, Leon, Iloilo, katapo sang nasambit nga rebelde nga grupo kag anay squad leader sang dismantled nga Southern Panay Front.
Ini matapos nagpatigayon sang combat operations ang mga tropa bilang sabat sa impormasyon gikan sa lokal nga pumuluyo nahanungod sa presensya sang mga armado nga NPA sa lugar.
Ginabanta tatlo ka mga katapo sang Regional Headquarters (RHQ) kag Central Front, Komiteng Rehiyon-Panay (CF, KR-P) ang naengkwentro sang tropa sang gobyerno.
Ang kamatayon ni Jose Jerry Tacaisan ang resulta sang firefight nga naglawig sang mga lima ka minutos.
Magluwas sa bangkay ni Tacaisan, nakumpiskar man sa lugar sang engkwentro ang isa ka M16 assault rifle, 85 ka bala sang 5.56mm, mga magasin para sa M16, isa ka bandolier, mga subersibo nga mga dokumento nga may mataas nga balor sa paniktik, kag personal nga mga pagkabutang.
Matandaan nga sang Lunes, Agosto 5, nag-engkwentrohanay man ang 82nd kag 12th Infantry Battalions kag ang amo man nga rebelde nga grupo sa Barangay Aglonok, Calinog, nga nagresulta sa kamatayon sang isa ka miyembro sang NPA, nga ginkilala kay Benjamin Cortel, alyas Mamang/Amor, ang Political Officer sang RHQ, KR-P, kag ang pagrekober man sang lima ka high-powered guns.
