𝗜𝗟𝗢𝗜𝗟𝗢 𝗖𝗜𝗧𝗬 —Nakilal-an na ang identity sang rebelde nga napatay sa engkwentro sa tunga sang 12th Infantry Battalion kag New People’s Army (NPA)sa Brgy. Aglonok, Calinog, Iloilo.
Sa interview sang Bombo Radyo Iloilo kay Lt Col J-Jay Javines, spokesperson sang 3rd Infantry Division, Philippine Army, iya ginpahayag nga na-engkwentro sang mga soldado ang indi magnubo sa 15 ka mga rebelde, kon sa diin, nalakip ang napatay.
Suno kay Javines, pagkatapos sang 15 ka minutos nga engkwentro, naglikaw ang mga NPA padulong sa naaminhan sang kabukiran, kag ginbilin ang ila patay nga kaupdanan nga ginkilala nga si Benjamin Cortel nga kilala nga Mamang/Amor, ang Political Officer sang Regional Headquarters (RHQ) Central Front of Komiteng Rehiyon – Panay (CF, KR-P).
Ginpahayag sini nga si Cortel naghalin sa Barangay Cochero, Molo, Iloilo City, kag asawa ni Lenilyn Custorio Jaynos, nga kilala nga Sandra, ang anay Finance Officer sang Komiteng Rehiyon-Panay kag nadakpan sang Setyembre 2022 sa Barangay Sibaguan, Roxas City, Capiz.
Una na nga ginreklamo sang mga residente ang ginahimo nga extortion sang mga rebelde sa lugar rason nga nagpatigayon sang operasyon ang military sa lugar.
Nagresulta man ang engkwentro sang pagkapilas sang nawala nga mata sang isa ka soldado nga sa subong yara naman sa mayo nga kondisyon.
Matapos ang engkwentro, nakuha naman sa encounter site ang mga matag-as nga kalibre sang mga armas, mga bala, granada, gadgets kag iban pa nga mga kagamitan.
