Nakarekord ang syudad sang Iloilo sang pinakataas nga numero sang mga ginbakunahan batok sa COVID-19.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga nagsaka sa 8,348 ang numero sang mga ginbakunahan sa syudad sa sulod lamang sang isa ka-adlaw.
Suno kay Conlu, ini nga rekord ang halin sa natipon nga numero sang mga ginbakunahan sa anom ka vaccination site sang syudad nga ginalakipan sang 800 sa University of the Philippines Visayas, 500 sa Iloilo City National High School, 1,500 sa University of San Agustin, 1,999 sa Central Philippine University, 1,800 sa Ateneo de Iloilo, kag 1,749 sa Iloilo Convention Center.
Pahayag sang natungdan, ginalauman nga malapawan pa ang record-high nga numero sang mga ginbakunahan sa tion nga mag-abot na ang mga bakuna nga ginprocure sang syudad.
