Ginmanduan na ni Punong Barangay Dominador Deocampo sang Tanza Baybay, Iloilo City Proper ang tanan nga opisyal sang ila lugar nga pangdakpon ang mga indibidwal nga nagapadulong sa ila barangay agud nga magpang-recruit sa mga pumuluyo para sa clinical trial.
Ginapahayag nga P2,500 ang balor nga ginahatag sa mga indibidwal nga magpasugot para sa pagpaidalom sa nasambit nga clinical trial sang COVID-19 vaccine.
Sa interview sang Bombo Radyo kay Deocampo, iya ginpahayag nga wala man lang nag-coordinate sa ila barangay ang pila ka mga indibidwal antes nagpang-recruit sa iya pumuluyo.
Bangud sini, wala man sila sang ihibalo nga may mga nagpasugot sa amo nga recruitment.
Apang antes ang clinical trial, ginpaidalom anay sa reverse transcription–polymerase chain reaction (RT-PCR) test ang pumuluyo kun sa diin may yara sang mga nagpositibo sa virus.
Suno kay Deocampo, wala nila ginpasugtan ang mga nagpositibo sa COVID-19 nga mag-home quarantine kag ginpangsaylo na lang ang mga ini sa quarantine facility.
Pahayag sang natungdan, wala man sang problema kun may yara siya sang pumuluyo nga magpasugot para sa clinical trial, apang nagakadapat nga maglisensya ang mga ini ilabi na ang mga recruiters sa ila barangay.
Ginpat-od sang opisyal nga sa tion nga madakpan nila ang mga nagapang-recruit sa ila lugar para sa clinical trial, ipadakop ang mga ini sa mga barangay tanod, i-report sa pulis kag pangkasuhan.
