Ginpasirado sang Department of Migrant Workers ukon DMW ang “Visa to America” nga agency matapos ini madakpan nga naga-operate nga wala sang lisensiya kag na-involve sa illegal recruitment.
Sa interview sang Bombo Radyo kay Asec. Jerome Alcantara sang DMW, ginpahayag sini nga ang operasyon kabahin sang simultaneous closure sa mga branches sang amo nga kompanya sa Ortigas, Quezon City, Zamboanga, Isabela, kag iban pa nga lugar.
Suno sa iya, madugay na nga ginbantayan sang ahensya ang recruitment office matapos nga may reklamo halin sa OFWs nga naka-engkwentro sini sa isa ka job fair.
Ang kompanya ginatudlo nga naga-promisa sang trabaho sa guwa sang pungsod bisan wala sang permiso nga lisensiya halin sa DMW.
Ginpahanumdom sang DMW ang publiko nga indi magpati sa mga ahensya nga wala sang klaro nga dokumento kag accreditation.
Ilabi na nga delikado ini kag posible magresulta sa pagpang-abuso o human trafficking sa mga aplikante.
