Gin-athag sang Regional Joint Security Control Center (RJSCC) sa Western Visayas nga wala pa ma- finalize ang listahan sang election areas of concern may kaangtanan sa May 12, 2025 elections.
Ang amo nga control center ang ginapamunuan sang Commission on Elections (COMELEC) kaupod ang Philippine National Police (PNP), Armed Forces of the Philippines (AFP), kag Philippine Coast Guard (PCG) bilang myembro.
Sa interview sang Bombo Radyo kay Atty. Dennis Ausan, regional director sang Commission on Elections Region 6, iya ginpahayag nga padayon pa nga gina-evaluate ang security risks sa rehiyon.
Nahibaluan nga sa amo nga listahan, ang Calinog gid lamang ang napaidalom sa “Red” category nga amo ang highest level sang election-related security concerns.
Suno kay Ausan, nagapatigayon pa ang control center sang workshops, evaluations, kag data sharing sa mga ahensya nga myembro agud nga mas maplantsa ang listahan.
Sa interview naman sang Bombo Radyo kay Brigadier General Michael Samson, commander sang 301st Infantry Brigade sang Philippine Army, iya ginpahayag nga ginpaidalom ang Calinog sa “Red” category bangud sa mga encounters sa tunga-tunga sang 2024.
Suno kay Samson, ini nga mga encounters ang nagresulta sa pag-neutralize sa pila ka matag-as nga opisyal sang New People’s Army (NPA) kag ang pagkabungkag sang Central Front sang Komiteng Rehiyon.
Pahayag ni Samson, kun basehan ang sitwasyon subong, ginsuhestiyon sini nga dapat panubuan sa “Yellow” category ang Calinog.
Sa idalom sang “Yellow” category, nga nagakahulugan nga may history sang election-related incidents ang area, nalakip diri ang Tobias Fornier sa Antique; President Roxas sa Capiz; Ajuy, Lemery, kag San Dionisio sa Iloilo; kag Isabela kag San Enrique sa Negros Occidental.
Ang “Orange” category,ukon areas of immediate concern, ang nagalakip sang Tapaz sa Capiz; Janiuay, Leon, Maasin, San Joaquin, kag Badiangan sa Iloilo; kag Calatrava, Cauayan, kag Sipalay City sa Negros Occidental.
