Daku ang nabulig sang voluntary blood donors agud indi maubusan ang Philippine Red Cross sang suplay sang dugo subong nga may COVID-19 pandemic.
Sa interview sang Bombo Radyo kay Catherine Lego, blood manager sang Red Cross – Iloilo Chapter, iya ginpahayag nga apisar sang lain-lain nga hangkat dala sang COVID-19 restrictions, nakatigayon nga makasuplay ang Red Cross sang dugo sa 26 ka public kag government-owned hospitals sa syudad kag probinsya sang Iloilo.
Lakip na diri ang Western Visayas Medical Center nga may yara man sang blood bank.
May yara man sang tion suno kay Lego nga naka-augment pa ang Red Cross Iloilo Chapter sang blood supply sa Metro Manila.
Nagapasalamat ang natungdan sa local government units bangud may yara ang mga ini sang inisyatibo sa mobile blood donations apisar nga nagatutok ang mga lideres nga matapna ang paglapta sang COVID-19.
Sang nagligad nga tuig, lakip sa mga hangkat nga naatubang sang Red Cross amo ang lockdown kag vaccine deferral.
Nagapangayo man sa gihapon sang bulig ang Red Cross sa mga pumuluyo nga balikdon ang ila nga social responsibility paagi sa pagdonar sang dugo.
Pwede nga makadonar sang dugo ang vaccinated nga mga indibidwal — first dose man ukon second dose ang nabaton — ukon bisan ano man nga vaccine brand ang gingamit.
Importante lang suno sa natungdan nga wala sang vaccine-related symptoms ang maga-donar sang dugo.
