Nagpanginwala si reelectionist Igbaras, Iloilo Mayor James Esmeralda nga nagpanagtag sang kuwarta ang iya nga partido agud nga makakuha sang boto sang mga tawo para sa May 9 elections. K
asunod ini sang mga pahayag nga nagdugok ang mga tawo sa isa ka private resort sa Barangay Jovellar kahapon sang udto nga ginsundan sang paglapta sang pictures kun sa diin may kuwarta nga P800 tubtob P1,000 nga upod sang sample ballot.
Sa sample ballot, nakabutang ang pangalan nanday presidential candidate Bongbong Marcos kag vice presidential candidate Sara Duterte-Carpio.
Yara man mismo ang pangalan ni Esmeralda amo man ang iya nga partido.
Sa interview sang Bombo Radyo kay Esmeralda, iya ginpahayag nga flyers lang ang ila nga ginpanagtag sang amo nga tion, kag indi matuod nga may nalakip nga cash.
Ginpahayag sini nga nagtingob ang tawo bangud nga may yara sila sang miting de avance.
Bisan ang alkalde ang nagpahayag nga nakibot ini sa volume sang tawo nga nag-abot. Ginkumpirma sang alkalde nga yara siya sa amo nga event, amo man si Rep. Dr. Janette Garin, kag iban nga local candidates apang pahayag sini, rally lang ang natabo.
Suno pa kay Esmeralda, indi man matuod ang pahayag nga gingamit niya ang Assistance to Individuals in Crisis Situation (AICS) sang Department of Social Welfare and Development (DSWD) agud nga makuha ang boto sang publiko.
Sa pagkamatuod suno kay Esmeralda, siya man ang nagpanugyan sa DSWD nga pagkatapos sang eleksyon ihatag ang kuwarta agud nga indi mahatagan sang malisya. ##
