Ginpanginwala ni re-elect Vice Mayor Aimee Paz Lamasan sang Duenas, Iloilo ang ginpasibangud sang iya kasumpong nga si Vice Mayoralty candidate nga si Atty. Kaiser Cordero tuhoy sa natabo nga vote buying sa Brgy. Pandan, Duenas, Iloilo.
Sa interview sang Bombo Radyo kay Atty. Edgar Pestaño, Legal Council ni Vice Mayor Aimee Paz Lamasan, iya ginpahayag nga nagkadto si Lamasan sa nasambit nga Barangay bangud kay ini ang gin-imbitar sa isa ka wedding anniversary.
Suno kay Pestaño, wala sang may natabo nga vote buying sa amo nga Barangay, kag dugang pa niya masobra 6 na kabulan nga ginahabuyan ang iya client sang fake news gikan sa piyak nga partido.
Madumduman nga nakita ang presensya ni Office of the Civil Defense (OCD) Region 8 Director Lord Byron Torrecarion sa nasambit nga Barangay kun sa diin may natabo nga ginaalegar vote buying nga gin-respondehan sang mga kapulisan.
May natabo man nga kumprontasyon sa tunga ni Torrecarion kag Cordero sa diin ginakwestyon sang regional director ang presensya sang abogado.
Gin-athag man ni Pestaño nga kilalahay si Vice Mayor Lamasan kag si (OCD) Region 8 Director Torrecarion, kag lunsay mga bisita sang nasambit nga kahiwatan.
Sa subong, gina-estoryahan na ni Lamasan kag sang iya abogado ang pagahimuon nga legal action, kag amo man ang pamilya nga nadisturbo ang nasambit nga celebrasyon sa amo nga lugar.
