ILOILO CITY- Nagapati ang Lemery Municipal Police Station nga nalikawan kuntani ang tinapungulay sa basketball game sa tunga sang Barangay Almeñana kag Poblacion Northwest Zone sa amo nga banwa kun natawgan na sang referee ang mga pisikal nga violation.
Sa interview sang Bombo Radyo Iloilo kay Police Captain Jose Winston Biadog, Officer in Charge sang nasambit nga estasyon, iya ginpahayag nga umpisa palang sang hampang nakita na ang pisikalan sa hampang sa semi-finals sa tunga sang duha ka teams.
Base sa impormasyon, gintawagan sang foul sang referee ang isa ka player sa team sang Barangay Almeñana matapos nga nag-violate ini sa pagbantay sang top-scorer sang pihak nga team.
Ginbalik na ang possession sang bola sa Poblacion Northwest Zone kun sa diin nagpadayon ang hugot nga pagbantay sa top-scorer sang nasambit nga barangay.
Gintiklod sang player sang Poblacion Northwest Zone ang player sang pihak nga team rason nga gintawgan ini sang unsportsmanlike foul.
Gilayon ginkwestyon sang basketball player ang desisyon sang referee.
Nahibaluan nga nangin mainit ang pagkuntrahanay sang duha ka barangay bangud posible mapagwa sa hampang ang sang top-scorer sang Poblacion Northwest Zone bangud natawgan na ini sang technical foul bag-o paman nakalab-ot sa last quarter sang hampang.
Paathag diri ni Biadog, wala ini sila sang may nabal-an nga impormasyon sa ginapasuni pag-intra sang mga referee nga pustahanay sa hampang.
Wala man sang plano magpasaka sang reklamo ang referee nga ginsumbag kag nagpaidalom man ini sa medical exam.
Natalana naman nga ipatawag ang tagsa ka kampo para hitsuhon ang amo nga kinagamo sa court.
Dugang pa sang natungdan, naistoryahan naman ang posibilidad nga indi na magkuha sang referee nga tumandok sang nasambit nga banwa agud indi na masulit ang insidente.
