ILOILO CITY – Nagapanawagan ang Simbahang Katolika sa publiko nga mas hugton pa ang pagtuo sa 2021 sa pihak sang mga pagtilaw dala sang pandemya.
Sa interview sang Bombo Radyo kay Reverend Father Angelo Colada, director sang Social Communications sang Archdiocese of Jaro, iya ginpahayag nga indi manegar ang mga kalalat-an nga dala sang nagligad nga tuig apang madamo man sang leksyon nga mahimo mabalon subong nga tuig.
Lakip sa mga malahalon nga leksyon suno kay Father Colada amo ang balor sang kabuhi, tion para sa pamilya, pagtumod sang mga prayoridad, kag paghibalo sa mga kinahanglanon.
“Sa likod sini tanan, wala lang kita nagatan-aw sang pagkadula kag kun ano ang nadula sa aton kundi ginatan-aw naton ang mga bagay ukon mga butang nga nagaabot sa aton para sa aton nga mga kaayuhan. We see the brighter side sa sini nga hitabo: ang pag-value naton sang kabuhi, tinion naton sa aton nga pamilya, ano ang mga priorities naton, what is essential kag what is important.”
Infected man sang COVID-19 ukon indi, tagsa ka tawo suno kay Father Colada ang nagaagi gid sa dalagku nga mga pagtilaw nga amo ang makabig nga ‘test of faith’.
Suno kay Colada, lain nga perspektibo ang dapat dal-on subong nga tuig kag dapat tinguhaan sang tawo nga mas mangin mabakod ang pagsalig sa Ginuo.
