Target sang Region 6 nga mapataas pa gid ang ila ranggo sa Palarong Pambansa 2026 nga opisyal na nga nagsugod subong nga hapon sa Agusan del Sur.
Sa interview sang Bombo Radyo kay Mr. Hernani Escullar Jr., spokesperson sang DepEd Region 6, iya ginpahayag nga ang ultimate goal sang Region 6 amo ang malab-ot ang rank 1 ukon rank 2 sa bug-os nga kompetisyon, apang importante man nga mapabilin nila ang ila ranggo tubtob sa rank 3.
Pahayag pa ni Escullar nga nangin positibo ang pagsugod sang hampang para sa rehiyon bangud nakadaog na bilang Champion ang team sa football nga una na nga ginpatigayon kahapon nga adlaw.
Suno pa sa iya nga kinahanglan depensahan sang Region 6 ang athletics, amo man ang makamedalya sa swimming kag sepak takraw bangud nadala sang rehiyon ang gold medal sang nagligad nga tuig.
Apisar nagalaom nga madala ang kampeonato sa rehiyon ginpunto man sini nga importante nga makakilala pa sang madamo nga mga abyan ang mga atleta sa rehiyon bangud suno sa iya nga maayo gid nga sa pagapauli sang mga kabataan, madala sang mga ini ang ila matahom nga eksperyensya.
