CAMP MARTIN TIOFILO DELGADO, ILOILO CITY- Ginmando ni Police regional Office 6 Director Pol. Brigadier General Rene Pamuspusan ang pagpatigayun sang imbestigasyon sa ginpatigayun nga press conference sang kontrobersyal nga si Pol. Lt. Col. Jovie Espenido apisar sang Gag Order ni PNP Chief Pol. General Archie Gamboa.
Sa interview sang Bombo Radyo kay Pamuspusan, iya ginpahayag nga ginpatwag na niya si Espenido agud makapaathag.
Suno kay Pamuspusan, hugot ang pagpangayo sang pasaylo ni Espenido sa PNP Chief bangud sa iya nahimo.
Ginpahayag man ni Pamuspusan nga nakahanda si Espenido nga magpaidalom sa imbestigasyon kag sundon kun ano man ang mando sa iya.
Nakadepende naman sa Deputy Regional Director for Administration kun may yara sang kaso nga ipasaka batok kay Espenido lakip na ang posible nga pagpatigayun sang summary hearing.
Nahibaluan nga ginpasa na sa Camp Crame ang resulta sang adjudication process apang may yara man sang kaugalingon nga adjudication process ang Camp Crame.
