ILOILO CITY – Nadugangan pa ang mga personnel sang regional government agencies sa Iloilo City nga nagpositibo sa coronavirus disease (COVID-19).
Santo sa Pebrero 3 nga bulletin sang City Epidemiology and Surveillance Unit – City Health Office, nagsaka na sa 16 ang kabug-usan nga COVID-19 cases sa Philippine Coast Guard – Western Visayas.
Duha diri ang panibag-o nga kaso kun sa diin ang isa amo ang 38 anyos nga lalaki nga taga-Barangay Sto. Domingo, Arevalo, Iloilo City samtang ang isa amo ang 31 anyos nga lalaki nga yara sa PCG Ship, Muelle Loney, Iloilo City Proper.
Walo naman ang narekord nga kaso sa Bureau of Immigration kun sa diin 6 ang naghalin sa Iloilo City kag 2 sa Iloilo Province.
Apat sa sini nga numero ang nagdugang sang Pebrero 3 nga ginalakipan sang:
- 42 anyos nga lalaki, residente sang Bito-on, Jaro;
- 35 anyos nga lalaki, residente sang Balabago, Jaro;
- 57 anyos nga lalaki, residente sang Oñate de Leon, Mandurriao; kag,
- 24 anyos nga babaye, residente sang Sto. Niño Sur, Arevalo, Iloilo City
Sa interview sang Bombo Radyo kay Jeck Conlu, COVID-19 spokesperson sang syudad, iya ginpahayag nga ini nga mga kaso ang nagpataas sang kaso sang local transmission sa una nga semana sang Pebrero.
Nahibaluan nga ang una nga mga kaso sa PCG Region VI ang natabo bangud sang ginpatigayon nga regional event kag gathering sang weekend.
Ginausia pa subong sang health authorities kun ano ang ginhalinan sang mga kaso sa regional office sang Bureau of Immigration.
Padayon pa subong ang contact tracing.
Ginaisip ini nga mga kaso sa idalom sang syudad sang Iloilo bangud diri ang ila nga opisina, apang gin-athag ni Conlu nga indi tam-an ka taas ang mga kaso sang local tranmission kun sa mga barangay lang.
Santo sa pinakaulihi nga record sang Department of Health Region VI, ang Iloilo City ang may yara na sang 5,043 ka total confirned cases sang COVID. Sa sini nga numero,4,809 ang total local cases, 277 ang active cases, 4,610 ang reported recoveries, kag 155 ang total reported deaths.
