Naaresto sang Iloilo City Police Office (ICPO) ang regional top-listed drug personality lakip ang isa ka security guard kasunod sang ginpatuman nga drug buy-bust operation sa Barangay Calumpang, Molo.
Ang mga subject amo sanday Alias “Ariane”, 48-anyos, residente sang Zone 2, Barangay Bakhaw, Mandurriao, Iloilo City; ginakabig bilang regional top-listed drug personality; kag si Alias “Toto”, 32-anyos, security guard kag residente sang Barangay Dacuton, Capiz.
Sa interview sang Bombo Radyo kay Police Captain Ryan Christ Inot, Head sang City Drug Enforcement Unit (CDEU), iya ginpahayag nga nakumpiskar ang 1,100 grams sang suspected shabu nga nagabalor sang ginabanta P7.5 million.
Suno kay Inot, ang mga nakumpiskar sa mga operasyon amo ang 39 ka heat-sealed plastic sachets nga may unod sang suspected shabu (lakip na ang buy-bust item),4 ka knot-tied nga plastic packs, buy-bust money kag non-drug-related items.
Samtang, gindayaw naman ni Mayor Jerry P. Treñas ang ICPO, sa pagpamuno ni PCol Kim Legada, kag ang Police Regional Office 6 (PRO6), sa pagpanguna ni PBGen Jack Wanky, sa pinakadaku nga drug recovery sang syudad subong nga tuig.
