Arestado ang isa ka registered criminologist sa drug buy-bust operation nga ginpatigayon sang Janiuay Municipal Police Station sa Brgy.Tamu-an, Janiuay, Iloilo.
Ini amo si Alyas Ricky, 29-anyos, isa ka street level individual (SLI) kag residente sang Brgy. Sambag, Zarraga apang temporaryo nga nagatinir sa Brgy. Tamu-an, Janiuay.
Sa interview sang Bombo Radyo kay Police Captain Hector Ayagan, hepe sang Janiuay Municipal Police Station,iya ginpahayag nga nakuha sa possession ni Ricky ang 25 gramos sang suspected shabu nga may standard drug price nga P170,000.
Suno kay Ayagan, nasugid man ni Ricky nga sa banwa sang Cabatuan siya nagakuha sang illegal nga droga kag sa malapit nga mga barangay niya ini ginabaligya.
Sa subong, yara na sa kustodiya sang Janiuay Municipal Police Station ang arestado nga indibidwal kag nagapangatubang sang reklamo nga paglapas sa Republic Act 9165 ukon Comprehensive Dangerous Drugs Act of 2002.
(Article: Bombo Hanna Andasa)
