ILOILO CITY – Temporaryo nga gin shutdown ang registration para sa mga indibidwal nga luyag magparegister sang QR code sa syudad sang Iloilo.
Sa exclusive interview sang Bombo Radyo kay Mr. Francis Cruz, pinuno sang Information Technology Division sang Iloilo City Hall, iya ginpahayag nga ginauna anay ang mga nagatrabaho sa mga establisyemento komersyal kag government offices.
Suno kay Cruz, hatagan anay sang duha tubtob tatlo ka semana ang nasambit nga registration.
Partikular nga gintumod sang natungdan amo ang mga nagatrabaho sa mall, call centers kag opisina sang gobyerno.
Ginpahayag ni Cruz nga sa tion nga makakuha na sang QR code ang nasambit nga mga empleyado, cellphone lang nila ang ipakita apang kun wala, nagakadapat nga magdala sang mga identifcation card.
Katuyuan sini amo nga mapadasig ang contact tracing sa tion nga may magpositibo sa COVID-19 sa isa ka lugar sa syudad.
Ang una nga himuon suno kay Cruz amo nga magsulod sa website nga www.uswagtracer.com.
Diri kag i-type ang username, password kag magregister as individual.
Nagakadapat man nga magpili kun bala ikaw Iloilo City resident, Working in Iloilo City kag Visiting Iloilo City.
I-type man ang Name, Address, Gender, Birth Date, Mobile Number kag Email kag i-submit.
Sa tion nga mabaton na ang QR Code sa e-mail address, nagakadapat pa ini nga i-validate.
Sa pag-validate, nagakadapat nga ipadala sa e-mail address sang nagpadala sang QR Code ang picture sang government-issued Identification (ID) card kag mag-selfie samtang naga-uyat sang nasambit nga ID.
Sa mga wala sang email, mahimo man magpabulig suno kay Cruz sa mga barangay officials.
Nagakadapat suno sa natungan nga i-print kag ang QR Code kag ipakita sa mga establisyemento sa syudad antes magsulod.
