ILOILO CITY – Nagalaum ang isa ka two-time galloner nga mangin madinalag-on siya sa pagdonar sang isa naman ka gallon nga dugo sa iya pagpapasakop sa Dugong Bombo 2019.
Sa interview sang Bombo Radyo kay Dorotheo Figura, 65 anyos, presidente sang Iloilo Rotary Club kag isa ka regular blood donor, makapila ka beses na siya nga nakadonar sang iya dugo sa bloodletting activity sang Bombo Radyo.
Suno kay Figura, nagsugod ang iya adbokasiya sa pagdonar sang tuman ang pagkinahanglan sang iya amay sang blood transfusion sang 90 anyos pa lamang ini.
Napatay na ang iya amay apang suno sa iya, nagpadayon siya sa pagbulig sa mga tawo paagi sa pagpasakop sa mga bloodletting sa kada tatlo ka bulan.
Iya ginpahayag nga sang 2003, bug-os nga team sang Iloilo Rotary Club ang nagpakigbahin man sa blood scilympics sa Iloilo Provincial Capitol.
Dugang ni Figura, paagi sa iya “commitment” sa Dugong Bombo, mapakita niya nga apisar wala siya sang kwarta, madamo siya sang pwede buligan.
“Mauntat lang ako sa pgdonate kon i-disqualify na ako sang Red Cross,” pahayag ni Figura.
Bilang pagpanghanda, regular ang exercise ni Figura kag nagalikaw man siya sa matambok nga mga pagkaon.
Nahibaluan nga pagahiwaton ang Dugong Bombo sa Nobyembre 16, Sabado, sa Iloilo Science and Technology University (ISAT-U) sa dalan Burgos, La Paz, Iloilo City.
