Padayon nga ginabantayan sang mga public health expert sa Western Visayas ang kaso sang preterm birth ukon pagbata sang wala pa sa ti-on, isa ka isyu nga nagahatag kabudlayan sa madamo nga ginikanan kag mga healthcare providers.
Sa interview sang Bombo Radyo kay Dr. Joseph Aldric Gaspar, Neonatologist kag Chairman sang Neonatal Care Center, iya ginpahayag nga masami nga nagakatabo ang preterm birth kon magbata ang isa ka nanay antes mag-abot ang ika-37 nga semana sang iya pagkabusong.
Ini nga kondisyon mahimo magresulta sa komplikasyon pareho sang budlay sa pagginhawa, pag-ubo, kag kabudlayan sa immune system sang bata.
Suno kay Gaspar, isa ini ka seryoso nga isyu nga kinahanglan tutukan kon sa diin, kalabanan sa mga bata nga premature ang ginadala sa Neonatal Intensive Care Unit agud maatipan sang maayo.
Ginpasiguro naman sang natungdan nga padayon ang ila programa sa maternal care kag prenatal education, agud malikawan ang mga kahimtangan nga mahimo magdala sang preterm labor, pareho sang high blood pressure, diabetes, kag infection.
Ginapangabay man sang talatapan ang kooperasyon sang komunidad kag mga ginikanan sa regular nga prenatal check-up kag husto nga pagkaon kag pagpahuway sang mga nagabusong.
