ILOILO CITY – Ginbalewala lang sang mga residente sang Marawi ang pagpalawig ni Presidente Rodrigo Duterte sang Martial Law sa Mindanao bangud sang kinagamo sa nasambit nga siyudad.
Sa interview sang Bombo Radyo Iloilo, ginpahayag ni Lanao del Sur Assemblyman Zia Alonto Adiong nga apisar ila ginakilala ang poder sang presidente bilang commander-in-chief, indi ini prayoridad sa karon sang mga Maranao.
Ginpahayag sang opisyal nga ang gusto lang sang mga evacuees amu nga masiguro nga makabalik ang mga ini sa ila puluy-an.
Kun palawigon suno kay Adiong ang Martial Law, indi lang dapat giyera ang hatagan sang atensyon bangud importante nga hatagan man sang atensyon ang kahimtangan sang masobra 400,000 internally displaced persons gikan sa Marawi.
Suno kay Adiong, dapat mangin agresibo ang gobyerno sa pagbulig sa mga evacuees kag hatagan prayoridad ang rehabilitasyon.
Dugang pa sang opisyal, apisar nga may Martial Law, luyag gihapon sang mga residente sang Marawi nga makabalik na sa ila normal nga pangabuhi.