Malipayon sa gihapon nga ginbaton sang Rehiyon 6 ang ila nga puwesto apisar nga nataktak ini halin sa rank 3 pakadto sa rank 5 subong nga adlaw kun sa diin magatapos naman ang Palarong Pambansa 2026 sa Agusan Del Sur.
Sa interview sang Bombo Radyo kay Mr Hernani Escullar Jr., Spokesperson sang DepEd Region 6, iya ginpahayag nga dako sa gihapon ang ila pagpasalamat sa kontribusyon sang tagsa ka atleta, coach kag mga delegado nga nagrepresentar sa Western Visayas sa kompetisyon.
Suno kay Escullar, madamo sang mga kabudlayan ang ila naagyan antes ang Palaro, apang wala gid nagkulang ang dedikasyon kag pagpaninguha sang ila mga atleta kag ginhatag gid nila ang ila best sa Palarong Pambansa.
Apisar wala nakasulod sa top three ang rehiyon, madamo sa gihapon sang nga positibo nga natabo lakip na diri ang pagdamo sang mga atleta nga nakakuha sang bag-o nga rekord sa nagkalain-lain nga hampang.
Suno pa kay Escullar kun ikumparar sa nagligad nga tuig, nagpakita sang maayo nga performance ang Region 6 subong nga tuig sa patag sang athletics nga isa sa mga nagpanguna nga naghatag sang medalya para sa rehiyon.
Apang, gin-ako man sang opisyal nga may yara pa sang madamo nga aspeto nga kinahanglan pa pasangkaron para sa mas maayo nga performance sa masunod nga mga kompetisyon.
