Kinahanglan anay nga maghulat-hulat ang fans sang singer-actress nga si Janella Salvador matapos nga ginsapubliko nga i-postpone ang iya nga 10th anniversary concert.
Natalana kuntani ang “Reimagined” concert sa Abril 19 sa New Frontier Theater apang indi na madayon bangud sa wala ginlauman nga mga sirkumstansya.
Gina-abisuhan man ang ticket holders nga taguon lang anay ang ticket bangud iga-reschedule man ang petsa sang event; ukon pwede man nga magpangayo na lang sang refund.
Nagpangayo naman sang pasaylo si Salvador sa fans kag nagpabutyag sang paglaum nga magakit-anay sila sa iga-anunsyo nga bag-o nga petsa sang konsyerto.
Ang “Reimagined” amo ang magamarka sang ika-10 nga tuig sang aktres sa music industry.
Sang nagligad nga Byernes, matandaan nga ginpostpone man ang mall shows sini para sa iya pelikula nga “Under Parallel Skies” kaupod kay Win Metawin. Sang ulihi, iya ginpaathag nga nagmasakit kag naga-recover pa lamang ang iya anak nga si Jude.
Si Salvador, 26, ang madugay na nga nakit-an sa nagkalain-lain nga television shows kaangay sang “Be Careful With My Heart”, “The Killer Bride”, kag nangin popular man nga Valentina/Regina Vanguardia sa “Darna”, apang sang damlag lang, ginpabutyag sini nga mas tutukan sini ang iya karera sa musika subong nga tuig.#
