Naglab-ot na kay Iloilo City Mayor Raisa Treñas ang reklamo nahanungod sa pagsukot sang dugang nga ₱50 sa mga pasahero halin sa Iloilo International Airport – sa taxi man ukon sa app-based transport.
Suno sa alkalde, bilang Chairperson sang Economic Development Committee of the Regional Development Council VI, gilayon ini nga nagpakig-coordinate sa Grab kag sa Association of Taxi Operators in Panay (ATOP).
Magapatigayon man ini sang meeting sa masunod nga semana.
Dugang pa ni Mayor Treñas, iya man sunod nga ipatawag ang Civil Aviation Authority of the Philippines
(CAAP) kag Land Transportation Franchising and Regulatory Board(LTFRB) agud matalakay ang problema kag maklaruhan ang publiko sa nagakaigo nga tikang nga ila himuon.
Ginapasalig man sini nga ang kaangay nga problema sa pagpanukot dugang sang plete ang iga-address gilayon kag may nagakaigo nga accountability, insakto nga mga tikang agud maprotektahan ang publiko kag pangalan sang Iloilo.
