ILOILO – Nakalab-ot na sa Public Order and Safety kag Committee on Transportation sang Iloilo Provincial Board ang reklamo sang mga residente sa Brgy. Nanga, Pototan, Iloilo nga apektado sang ginapatuman nga signal jamming sa Iloilo District Jail (IDJ).
Sa privilege speech ni Iloilo 3rd District Board Member Matt Palabrica, iya ginpahayag nga nagayamo ang mga tawo sa sulod sang 300-meter radius sang IDJ bangud indi sila makatawag ukon makapadala sang text message humalin Hunyo subong nga tuig.
Sa tion nga may mga emerhensiya, ginasiling man nga tuman kabudlay ang komunikasyon.
Ginpahayag ni Palabrica nga napalab-ot naman sang mga pumuluyo ang ila reklamo sa Local Government Unit (LGU) sang Pototan apang luyag nila nga makalab-ot ini sa opisina sang gobernador sang probinsya.
Suno kay Palabrica, kinahanglan nga hatagan sang pagtamod ini nga “social kag economic” nga isyu bangud indi manegar kon daw ano ang pagsalig sang mga tawo subong sa cellphone kag sa social media bilang nagapanguna nga paagi sang komunikasyon.
May kaangtanan diri, ginalauman man ang ihatag nga paathag sang Bureau of Jail Management and Penology (BJMP), Philippine Drug Enforcement Agency (PDEA) kag National Telecommunications Commission (NTC) sa hiwaton nga committee hearing.
Nahibaluan nga gin-install ang signal jammer bilang “crime prevention” sa amo nga lugar agud indi maka-contact sa guwa ang mga preso kag malikawan ang drug-trade ukon ang mga kontrabando.
