Apisar nagalalapta na sa social media ang pictures sang ginapahayag vote-buying sa probinsya sang Iloilo subong nga nagahingapos na ang election campaign period, wala sang pormal nga reklamo nga napalab-ot sa Iloilo Police Provincial Office (IPPO).
Sa interview sang Bombo Radyo kay Police Senior Master Sergeant Francisco Lindero, Jr., spokesperson sang IPPO, iya ginpahayag nga mismo ang pulis ang naka-monitor man online sa alegasyon sang pila ka mga residente nga may yara sang mga pulitiko ukon partido nga nagapamakal sang boto.
Apang suno kay Lindero, ginahulat sang pulis nga ma-formalize sang mga tawo ini nga reklamo kag makabitbit sang ebidensya.
Nagmandu man si IPPO director Pol. Colonel Adrian Acollador nga pabaskugon pa ang presensya sang mga pulis paagi sa checkpoint operations sa probinsya. Paagi sa random checkpoint, ginalauman nga matapna ang vote buying, vote selling, kag harassment.
May yara sang masobra 1,600 ka augmentation personnel para sa IPPO subong nga tion agud masigurado nga mangin matalunsay ang eleksyon. ##
