ILOILO CITY – Ginkadismaya ni Iloilo City Mayor Jerry Treñas ang pagbalibad sang West Visayas State University Medical Center sa isa ka lalaki nga nakitaan sang flu-like symptoms sa rason nga indi man kritikal ang sitwasyon sang pasyente.
Sa interview sang Bombo Radyo kay Treñas, iya ginpahayag nga may yara na sang mandu sa tanan nga private kag public hospital sa syudad sang Iloilo nga batunon ang tanan nga pasyente, may Coronavirus Disease 2019 (COVID-19) man ukon wala.
Suno kay Treñas, maathag nga criminal offense ang ginhimo sang hospital management sa biktima nga si Bergil Lencioco sang Brgy. Lambuyao, Oton, Iloilo nga sa ulihi, naghikog bangud sa depresyon matapos ang insidente.
Ginpahayag ni Treñas nga dapat nga maghatag sang paathag ang West Visayas State University Medical Center kun nga-a wala ginbaton ang biktima nga mapabulong kun tani bangud sa ginabatyag nga balati-an.
Samtang, nakalab-ot na sa Office of the Presidential Assistant for the Visayas ang tuhoy sa reklamo sang pamilya sang lalaki nga naghikog sa taytay malapit sa isa ka mall sa Brgy. Pulo Maestra Vita sa banwa sang Oton.
Suno kay Assistant Secretary Anthony Gerard “Jonji” Gonzales, indi niya mahangpan kun nga-a natabo ang kasubong nga insidente nga sa pagkamatuod, may yara sang twinning agreement ang Department of Health may kaangtanan sa COVID-19 response.
Ginpahayag ni Gonzales nga hibaluon niya kun bala matuod gid ang pahayag sang pamilya sang biktima kag kun mapamatud-an, sundon niya ang mandu ni Presidente Rodrigo Duterte nga kuhaan sang lisensya ang hospital nga nagpamalibad nga magbaton sang pasyente.
