ILOILO CITY – Tinguhaan ni Iloilo City Councilor Ely Estante, chairman sang Committee on Market and Slaughterhouse, nga makadihon sang win-win solution may kaangtanan sa reklamo sang mga fish vendor sa Iloilo Terminal Market bangud sa mga kompetensya sa Iloilo Fish Port Complex.
Sa interview sang Bombo Radyo kay Estante, iya ginpahayag nga ipatawag niya sa pagsinapol ang manager sang Iloilo Fish Port Complex, pinuno sang Local Economic Enterprise Office nga si Mr. Ariel Castañeda kag ang mga vendor agud nga masolbar ang problema.
Suno kay Estante, indi ini ang labing una nga kahigayunan nga nagtuhaw ang nasambit nga problema sa diin may yara man sang kahilwayan ang mga konsumidor kun sa diin magabakal sang produkto.
Ginpahayag ni Estante nga mas maayo kun may yara sang lihok nga pagahimuon nga patas para sa tanan agud nga wala sang may madulaan sang palangabuhian.
Samtang, gin-athag naman ni Estante nga wala niya ginabalabagan ang pagpatukod sang mga talipapa sa syudad sang Iloilo.
Suno kay Estante, mas maayo nga mapasanyog ang mga magagmay nga negosyo apang nagakadapat lang nga masigurado nga malimpyo kag de-kalidad ang produkto nga ginabaligya.
Ginpahayag ni Estante nga mas makapaayo kun tutukan ang quality control sa mga ginabaligya sa talipapa agud nga masigurado man ang seguridad sang mga manugbakal.
