ILOILO CITY – Nagataas sa tagsa ka tuig ang numero sang reklamo tuhoy sa Cybercrime sa Western Visayas.
Sa interview sang Bombo Radyo kay Patrolman Emerito Frutas Jr. sang Regional Anti-Cybercrime Unit 6, iya ginpahayag nga naglab-ot na sa 37 ang reklamo tuhoy sa paglapas sa Cybercrime Prevention Act humalin sang Enero tubtub Hunyo subong nga tuig.
Sa pagpaathag ni Patrolman Frutas, ang Cybercrime ukon ang computer-oriented crime amo ang mga krimen nga nahimo gamit ang computer ukon anu man nga sahi sang teknolohiya nga nagagamit sang internet.
Nalakip sa kategorya sang Cybercrime amo ang hacking ukon ang unauthorized access gamit ang gadgets, cyberstalking ukon ang paggamit sang internet kag nanari-sari nga online platforms agud nga magpang-harrass sang tawo, Online identity theft ukon ang paggamit sang identity sang isa ka tawo nga wala sanga pahanugot, Child Abuse ukon Child Pornography, Ransonware attack kag Internet fraud ukon scam.
Suno kay Patrolman Frutas, ang paglapas sa Intellectual property, online libel, child pornography kag identity theft ang nagapanguna nga reklamo sa pungsod.
Ginpahayag ni Patrolman Frutas nga bangud nga nagamoderno naman ang teknolohiya subong, nagamoderno naman ang modus sang mga traditional traffickers agud nga indi madali nga madakpan.
Ang mas istrikto nga pagpatuman sang mga existing nga mga layi ang solusyon sa pagtapna sang Cybercrime.
Panugyan sang natungdan sa tanan nga mangin responsable bangud nga ang social media ang ginhimu para sa komunikasyon kag indi sa paghimo sang krimen.
