Ginbasura sang regional prosecutor ang reklamo nga ginpasaka batok sa isa ka police major nga naangot sa hinali nga pagkadula sang teacher kag beauty queen nga si Catherine Camilon.
Ginpahayag nga gin-dismiss sang piskalya ang panumbungon bangud kulang ang ebidensya.
Matandaan nga complaints nga kidnapping kag serious illegal detention ang ginpasaka batok kanday Police Major Allan de Castro kag iya driver-bodyguard nga si Jeffrey Magpantay.
Nahibaluan nga base sa imbestigasyon, nagaguwa nga si De Castro ang ulihi nga kaupod ni Camilon antes siya na-report nga missing sang Oktubre 2023 sa Batangas. Nagaguwa man nga may relasyon sila nga duha, kag nagapakigbulag na si Camilon.
Ginpanginwala naman ni De Castro nga nobya sini ang beauty queen samtang todo-panginwala man si Magpantay nga may kaangtanan siya sa pagka-missing sang biktima.
Matandaan nga naimbitar anay si De Castro sa hearing sang Senate committee on public order and dangerous drugs kag na-cite in contempt pa bangud sa ginapahayag pagbinutig sa atubang sang mga senador kaangot sa iya relasyon sa beauty queen.
Duha ka adlaw ang nagligad, ginhilway man ini ni Senator Ronald “Bato” dela Rosa bangud bakasyon sang Senado sa sulod sang isa ka bulan. Makatawo man ini nga rason suno kay dela Rosa kag nagahibi na ang pulis suno sa iya sa pagpaathag nga wala sila sang relasyon sang biktima.
Matandaan nga base sa CCTV footage nga na-capture sang Oktubre 12, nakit-an ang salakyan ni Camilon nga naglabay sa pila ka banwa sa Batangas kag ginadudahan nga wala ini nagaisahanon.
May mga testigo nga nagpalapit sa otoridad kag nagpanugid nga nakit-an nila ang lawas ni Camilon nga duguon kag ginasaylo halin sa iya salakyan pakadto sa lain nga salakyan sang Oktubre 12. Ginsiling man sang mga testigo nga nakit-an nila si Jeffrey Magpantay sa area.
Ini nga salakyan ang na-recover sang pulis kag may nakit-an nga mga buhok kag dugo nga nag-santo naman sa DNA profile sang mga ginikanan sang beauty queen. Wala sang kumpirmasyon halin sa otoridad kun buhi ukon patay na ang biktima bangud wala pa nakit-an ang lawas sini.
Matandaan man nga ang involved nga police major ang napahalin na sa serbisyo sang Enero 2024 suno sa Philippine National Police-Calabarzon office bangud sa conduct unbecoming of a police officer.#
