ILOILO CITY – Ginpaboran sang isa ka political analyst ang rekomendasyon ni Vice President Leni Robredo tuhoy sa war on drugs campaign sang Duterte Administration.
Ini ang kasunod sang pahayag ni Robredo nga failure ukon wala nakapasar ang grado sang gobyerno sa pagtapna sang illegal drugs sa pungsod.
Sa interview sang Bombo Radyo kay Ramon Casiple, executive director sang Institute for Political and Electoral Reform, iya ginpahayag nga matuod ang pahayag ni Robredo nga daku ang problema kun illegal drugs ang pagahambalan.
Suno kay Casiple, sa ginplastar nga data sang Bise Presidente, maathag nga wala pa sa gihapon matapna ang madugay na nga problema sa pungsod bangud nga madamu sa gihapon ang volume sang illegal drugs nga nakumpiska sa drug operations.
Ugaling suno kay Casiple, makabig nga kwestyonable ang mga data nga ginplastar ni Robredo bangud nga ang tagsa ka ahensya sang gobyerno ang may nanari-sari nga statistics.
Isa sa ginalantaw nga rason sang Political Analyst amo nga nagasaparanay ang tagsa ka ahensya sang gobyerno tuhoy sa pagtipon sang data agud nga makakuha sang mas daku nga pondo.
Gin-athag man sang natungdan nga wala niya ginabasol ang Bise Presidente ukon bisan sin-o nga opisyal sang pungsod kundi ang iya opinyon ang nasanto lamang sa facts nga iya natipon.
