MANILA – Hugot nga ginapanugyan ni Presidente Rodrigo Duterte ang pagpatuman sang mas ginpasangkad nga lihok agud nga matapna ang paglapta sang Coronavirus Disease 2019 (COVID-19).
Ini matapos nga ginpaidalom na sa Code Red Sub-Level 2 ang Pilipinas bangud sa nagadamo nga numero sang mga nagpositibo sa COVID-19.
Sa iya mensahe sa Malacañang, ginpahayag ni Presidente Duterte nga nagakadapat nga ipatuman ang work kag class suspension lakip na ang travel restrictions agud nga indi na maglala ang krisis sa pungsod.
Ginpatpat ni Presidente Duterte nga ang mga panugyan sang Inter-Agency Task Force for the Management of Emerging Infectious Diseases.
Lakip sa nakasaad sa resolution amo ang mga masunod:
-Kinahanglan nga ipatuman ang province quarantine kun may yara sang indi magnubo sa duha ka nagpositibo sa COVID-19 sa isa ka probinsya
-May yara sang access sa relief response fund ang Local Government Unit nga nagpahamtang sang community quarantine kag nagdeklarar sang state of calamity
-Suspendido ang trabaho sa gobyerno apang may yara sang skeletal work force nga magapabilin agud nga maghatag sang serbisyo
-Ang flexible work arrangement ang nagakadapat nga ipatuman sa private sector samtang ang yara sa welfare, manufactiring kag retail services ang magapadayon apang dapat sundon ang social distancing
-Magapadayon ang biyahe sang public transport system kag dapat nga sundon ang social distancing magluwas lang kun may yara sang mandu ang Department of Transportation
-Nagakadapat nga sundon ang mandu sang Department of Health nga amo ang lead agency sa pagtapna sang COVID-19
-Suspendido ang domestic land, air kag sea travel halin kag padulong sa Metro Manila umpisa Marso 15 tubtub Abril 14
