MANILA – Magapasa na sang rekomendasyon kay Presidente Rodrigo Duterte ang Task Force nga nagapanguna sa imbestigasyon may kaangtanan sa kurapsyon sa Philippine Health Insurance Corporation (PhilHealth).
Sa public address, ginpahayag ni Department of Justice Secretary Menardo Guevarra nga ang rekomendasyon ang igapasa sa Setyembre 14, Lunes nga adlaw.
Suno kay Guevarra nga amo ang nagapanguna sa Task Force PhilHealth, lakip man sa igapasa amo ang posible kaso nga ipasaka sa PhilHealth officials nga mapamatud-an nga naangot sa kurapsyon nga nabalahuba sang Hulyo.
Ang tanan nga hearing suno kay Guevarra ang natapos na kahapon, Setyembre 7 apang sa pihak sini, mahimo sa gihapon nga ipasaka ang iban nga kaso apisar nga napasa na ang rekomendasyon bangud separado man ang case build-up.
Nahibalu-an nga nabalahuba ang ginapahayag kurapsyon kasunod sang resignation sang PhilHealth anti-fraud officer nga si Thorrsson Montes Keith.
