ILOILO CITY – Padayon nga ginabaton sang Iloilo City Government ang dugang nga bulig sang pribado nga mga sektor kag indibidwal para sa mga naapektuhan sang total lockdown sa 14 ka mga baranggay sa syudad.
Sa interview sang Bombo Radyo kay Jonas Antonio Belosillo, chief of staff sang opisina ni Iloilo City Mayor Jerry Treñas kag amo ang in-charge sang repacking sang goods sa Jaro Gym, iya ginpahayag nga naga-sige sige ang pag-abot sang ayuda halin sa business sectors kag gilayon man ini nga gina-turn over sa mga barangay.
Para sa mga luyag maghatag sang ayuda, mahimo direkta nga magkadto sa Jaro Gym kag hatagan sang acknowledgment receipt ang magadonar.
May personnel man ang Iloilo City Government nga in charge sa pag-repack kag pagdeliver.
Nagpalab-ot man sang pagpasalamat si Mayor Jerry Treñas sa tanan nga naghatag sang ayuda sa mga apektado nga mga pumuluyo sang syudad.
Lakip diri ang Florete Group of Companies sa pagpamuno sang Chairman nga si Dr. Rogelio Florete nga nagdonar sang 200 ka sako sang commercial rice nga nagabug-at sang 50 kilo ang kada sako. #
