Wala ginadula ang mga espekulasyon nga gin-relieve sa pwesto si Police Colonel Bayani Razalan bilang Iloilo Police Provincial Office (IPPO) Director kaangot sa natabo nga payout sa 4th District sang Iloilo.
Sa amo man nga tion, ginapahayag nga involve diri ang isa ka incumbent congressman sa amo nga Distrito.
Santo sa impormasyon nga nakuha sang Bombo Radyo, Abril 14, 2025 sang may ginpatigayon nga caucus sa Brgy. Maasin, Passi City kag sa amo nga tion may ginapatigayon man nga payout sang Ayuda sa Kapos ang Kita Program (AKAP) sang Department of Social Welfare and Development (DSWD).
Ang personnel sang DSWD ang nagmandu nga indi pag-umpisahan ang payout samtang yara pa ang presensya sang mga pulitiko rason man nga na-delay ini.
Didto na kag nagsugod ang pagkakibot sang punong barangay sang nasambit nga lugar.
Sa amo nga tion, yara naman ang presensya sang pila ka pulis kag Special Weapons and Tactics (SWAT) Personnel kon sa diin, ginkumpirma man nga nag-agi lang kag parte lamang ini sang integrated plan sang IPPO.
Gin-athag naman sang kapulisan nga normal lamang nga ginasundan nila ang amo nga kahiwatan ukon payout ilabi na nga may involve nga kwarta.
Posible naman nga ini ang ginlantaw sang Camp Crame nga rason ukon nakalab-ot nga istorya sa ila nga bahin, nga nangin rason man sang ila nga desisyon batok kay Razalan.
Sa pagpakig-angot sang Bombo Radyo kay Police Lieutenant Colonel Arnel Solis, spokesperson sang Police Regional Office 6, iya ginpahayag nga last week sang nagpadala sila sang sulat sa Commission on Elections (COMELEC) agud hibaluon ang sitwasyon sang relief order ni Razalan.
Apang, tubtob subong wala pa sang reply ukon confirmation ang COMELEC kaangot sa relieve order, rason nga magapabilin sa gihapon nga director sang IPPO si Razalan.
Una na nga gintuad sang COMELEC nga temporaryo nga magatal-us kay Razalan si Colonel Rolando Bulalacao, ang chief regional staff sang PRO 6.
