JAPAN – Gin-aprubahan na sang Japanese Health Minister ang bulong nga Remdesiver bilang labing una nga anti-viral drug sa Japan batok sa Coronavirus Disease 2019.
Suno kay Bombo International Correspondent Jocel Palma direkta sa Japan, ang nasambit nga bulong ang ginagamit sadto para sa mga pasyente sang E-bola kag gindevelop sang Estados Unidos.
Dugang sang natungdan, matapos nga gin-aprubahan sang Food and Drug Administration sa Estados Unidos, gin-aprubahan man ini sang health ministry sang Japan.
Santo sa pahayag ni Palma, ginatun-an na sang gobyerno sang Japan kun paano sila makabakal sang madamo nga suplay sang nasambit nga bulong bangud limitado lamang ini.
Bangud diri, temporaryo nga pagalimitahan sang gobyerno ang pagpanghatag sang nasambit nga bulong kag prayoridad lang ang mga ospital nga may yara sang pasyente sang COVID-19 nga yara subong sa kritikal nga kondisyon.
Sa subong, ginapreparahan na sang Japan ang posible nga second wave sang COVID-19 bangud sa liwat nga pagtaas sang kaso sang nasambit nga balatian nga nagdangat na sa 15,575 sa diin 5,146 diri ang naka recover na kag 590 naman ang nagkalamatay.
Madumduman nga una na nga gindeklarar ni Japanese Prime Minister Shinzo Abe ang pagpalawig sang State of Emergency sa Japan tubtob Mayo 31.
