Ginpagwa sang Office of the Ombudsman ang mga kopya sang mga desisyon sang anay nga mga Ombudsman nga sanday Conchita Carpio-Morales kag Samuel Martires may kaangtanan sa anay dismissal order batuk kay Senador Joel Villanueva.
Madumduman nga gintawag ni Ombudsman Jesus Crispin Remulla nga isa ka “secret decision” kag misteryoso ang 2019 ruling ni Martires nga nagbaliskad sa una nga mandu ni Morales nga magpahalin kay Villanueva sa serbisyo publiko. Ini kaangot sa alegasyon nga P9.7 milyon nga pork barrel anomalies samtang kongresista pa si Villanueva sang CIBAC Party-list.
Sa desisyon ni Martires, ginsiling nga kulang sa ebidensya agud mapamatud-an ang pagkaulamid ni Villanueva sa gin-alegar nga sayop nga paggamit sang pondo.
Suno sa report sang NBI, napat-od nga palsipikado ukon ginpeke ang pirma sang senador sa pila ka dokumento.
Dugang pa diri, wala man sang ebidensya nga nagpakita nga nagbenepisyo si Villanueva ukon iban pa nga mga respondent sa nasambit nga kwarta.
Sa baylo, ginrekomendar sang Ombudsman nga palawigon pa ang imbestigasyon agud makilala kon sin-o ang responsable sa pagpangpeke sang mga dokumento.
Ginpasugtan naman ni Remulla nga ipaguwa sa publiko ang mga desisyon para sa benepisyo sang publiko kag agud malikawan ang mga tsismis.
